DRC: Umwe mu bajyanama ba perezida Tshisekedi yishwe na coronavirus
Minisiteri y’ubuzima muri Repubulika iharanira Demokarasi ya Congo yatangaje ko umuntu wa gatatu yahitanywe na Coronavirus.
Uwapfuye yari umunyamategeko uhagarariye itsinda ry’abanyamategeko bagira inama Perezida Félix Tshisekedi wa RDC.
Jean Joseph Mukendi wa Mulumba bivugwa ko yanduriye Coronavirus mu rugendo aherutsemo mu Bufaransa.
Ni umwe mu bantu bari bakomeye mu bahoze batavuga rumwe na Leta ya Joseph Kabila ndetse no mu baharanira uburenganzira bwa muntu.
Yahoze ari umwe mu byegera bya hafi bya Etienne Tshisekedi, se wa Perezida Félix Tshisekedi.
Kugeza kuri uyu wa kane, tariki ya 26 Werurwe 2020, RD Congo imaze kwemeza abantu 48 barwaye Coronavirus.
Kuwa Kabiri, Perezida Tshisekedi yatangaje ko imipaka ifunzwe ndetse ko umujyi wa Kinshasa ushyizwe mu kato mu kwirinda ikwirakwira rya Coronavirus.
