Djihad Bizimana yatangiye imyitozo mu kipe ye nshya ya Beveren
Umunyarwanda Bizimana Djihad wari usanzwe ukinira APR FC, yamaze gutangira imyitozo mu kipe ya Waasland Beveren yo mu cyiciro cya mbere mu Bubiligi yamuguze mu kwezi kwa kane k’uyu mwaka.
Ku wa kane w’icyumweru gishize ni bwo uyu musore ukomoka mu karere ka Rubavu yahagurutse i Kigali yerekeza mu gihugu cy’Ububiligi, gusa ubwo yahageraga ku wa gatanu ntiyashoboye gutangirana na bagenzi be imyitozo kubera umunaniro.
Kuri uyu wa mbere, ni bwo uyu musore yakoranye na bagenzi be ku ncuro ya mbere mu rwego rwo kwitegura shampiyona y’ikiciro cya mbere mu Bubiligi iteganyijwe gutangira mu mpera z’ukwezi gutaha.
Djihad Bizimana azajya yambara numero 8 yari asanzwe yambara muri APR FC yari asanzwe akinira, iyi ikaba ari na numero ba nyirarume Sibomana Abdoul na Haruna Niyonzima bambaraga ubwo bakinaga muri iyi kipe y’ingabo z’igihugu.
