Dani Alves wakanyujijeho mu makipe atandukanye i Burayi yerekeje iwabo muri Brazil
Myugariro Dani Alves wakanyujijeho mu makipe atandukanye akomeye yo ku mugabane w’Uburayi, yerekeje mu kipe ya Sao Paulo y’iwabo muri Brazil nta mafaranga atanzweho.
Dani Alves kuri ubu ufite imyaka 36 y’amavuko, yakiniye amakipe ya Sevilla FC, FC Barcelona na Juventus, mbere yo kwerekeza muri PSG yo mu Bufaransa mu mpeshyi ya 2017.
Ikipe ya Sao Paulo yasobanuye Alves nk’umukinnyi wagize ibihe byiza mu mateka, dore ko uyu mugabo yatwaye ibikombe birenga 40 nk’umukinnyi w’umupira w’amaguru.
Dani Alves yaherukaga gukkina muri Brazil mbere ya 2002 akinira ikipe ya Bahia.
Perezida wa Sao Paulo Carlos Augusto de Barros e Silva yasobanuye Dani Alves nk”umwe mu bakinnyi bayoboye ruhago y’isi uzwiho ubunyamwuga bukomeye, kuba ari umukinnyi ugira intego kandi uhorana icyaka kidashira cyo gutsinda no gutwara ibikombe.”
Dani Alves yerekeje muri iyi kipe, nyuma y’ibyumweru bike yegukanye igikombe cya Copa America ari kumwe n’ikipe y’igihugu ya Brazil yari abereye Kapiteni.
Mu myaka 17 yari amaze akina ku mugabane w’Uburayi nk’uwabigize umwuga, yashoboye kwegukana ibikombe bya shampiyona ari kumwe n’amakipe ya FC Barcelona, Juventus na PSG.
Muri rusange FC Barcelona yatwaranye na yo ibikombe bitandatu bya shampiyona ya Espagne na bitatu bya UEFA Champions league, Juventus atwarana na yo igikombe kimwe cya shampiyona y’Abataliyani mu gihe PSG yatwaranye na yo ibikombe bibiri bya shampiyona y’Abafaransa.
