AmakuruImikino

Copa America: Coutinho yafashije Brazil kwitwara neza mu mukino ufungura irushanwa

Ikipe y’igihugu ya Brazil Seleção, yatangiye irushanwa rya Copa America yitwara neza nyuma yo kunyagira Bolivia ibitego bitatu ku busa, mu mukino ufungura irushanwa.

Ni umukino Brazil yafashijwemo cyane na Coutinho wayitsindiye ibitego bibiri muri bitatu yatsinze. Iyi kipe y’umutoza Tite yakiriye iyi mikino ya Copa America, ntiyarifite Neymar Jr. utazagaragara muri iri rushanwa kubera imvune y’akagombambari yagiriye mu mukino wa gicuti Brazil yakinagamo na Qatar.

Brazil yihariye iminota hafi ya yose y’igice cya mbere cy’umukino, inabona yemwe uburyo bwinshi bushoboka bwo kuba yafungura amazamu ariko abasore nka Roberto Firmino, Thiago Silva, David Neres na Coutinho ntibabasha gufungura amazamu.

Igice cya mbere cy’umukino cyarangiye amakipe yombi anganya 0-0.

Mu gice cya kabiri cy’umukino, Brazil na bwo yakomeje kurusha ku buryo bukomeye ikipe ya Bolivia, ari na ko yisirisimba imbere y’izamu ryayo.

Philippe Coutinho ukinira FC Barcelona yafunguye amazamu ku munota wa 53, ku gitego yatsinze kuri Penaliti. Ni nyuma y’umupira myugariro Adrian Jusino yari akinnye n’akaboko mu rubuga rw’amahina, bikaba ngombwa ko umusifuzi atanga Penaliti nyuma yo kwiyambaza VAR.

Coutinho yongeye gutsindira Brazil ikindi gitego nyuma y’iminota itatu, ku mupira mwiza yari ahawe na Firmino bikarangira awuteretse mu izamu n’umutwe ku buryo bworoshye cyane.

Ikipe y’igihugu ya Brazil yasoje akazi ku munota wa 85 ibifashijwemo na rutahizamu Everton Soarez wari winjiye mu kibuga asimbura David Neres ukinira Ajax.

11 bari babanje mu kibuga hagati y’amakipe yombi.

Brazil: Alisson; D. Alves, Marquinhos, T. Silva, F. Luís; Fernandinho, Casemiro, Coutinho; Richarlison (Willian), Firmino (G. Jesus), Neres (Everton)

Bolivia:  Lampe; D. Bejarano, Haquín, Jusino, M. Bejarano; Saavedra (L. Vaca), Justiniano, Sucedo (Wayar), Chumacero; Castro (R. Vaca); Moreno

Twitter
WhatsApp
FbMessenger