Chelsea yahumaniye n’isanganya ku kibuga cy’ikipe ya Manchester City (Amafoto)

 

Ikipe ya Chelsea yo mu gihugu cy’u Bwongereza, ihuriye n’uruva gusenya ku kibuga cya El Etihad cy’ikipe ya Manchester City ihanyagirirwa ibitego byose 6-0.

Hari mu mukino w’umunsi wa 27 wa shampiyona y’Abongereza aya makipe yari yahuriyemo.

Manchester City ikomeje guhanganira na Liverpool igikombe cya shampiyona, yatangiye uyu mukino yotsa ikipe ya Chelsea igice cya mbere kirangira iyibonyemo ibitego 4-0.

Ni ibitego byinjiye mu minota 25 ya mbere y’umukino. Igitego cya mbere kinjiye ku munota wa gatatu gitsinzwe na Raheem Sterling ku mupira yari ahawe na Bernardo Silva.

Ikipe ya Manchester City yatsinze igitego cya kabiri ku munota wa 14 w’umukino ibifashijwemo na Sergio Kunu Aguero. Ni ku ishoti rikomeye yarekuriye inyuma y’urubuga rw’amahina birangira umupira uruhukiye mu izamu rya Kepa Arrizabaraga.

Nyuma y’iminota itandatu Aguero yaje gutsindira Manchester City igitego cya gatatu, ku mupira yari yiherewe na Ross Barkley.

Iyi kipe y’umutoza Pep Guardiola yatsinze igitego cya kane ku munota wa 25 ibifashijwemo na Ikary Gundogan.

Mu gice cya kabiri cy’umukino, ikipe ya Manchester City na bwo yagarutse ifite gahunda yo gushaka ibindi bitego.

Umunya-Argentine Sergio Aguero yatsindiye Manchester City igitego cya gatanu ku munota wa 57. Ni igitego yatsinze kuri Penaliti nyuma y’ikosa Cesar Azpilicueta yari akoreye kuri Raheem Sterling wari wamuzonze. Iki gitego cya gatatu Aguero yatsinze cyatumye aca agahigo ko kuba ari we watsinze Hat-tricks nyinshi muri Premier league aho amaze kuzuza 11 yatsinze.

Man City yashoje akazi ku munota wa 81 ku gitego cyatsinzwe na Raheem Sterling.

Gutsinda uyu mukino byahise bishyira Man City ku mwanya wa mbere ku rutonde rwa shampiyona n’amanota 65 inganya na Liverpool iyikurikira. Cyakora cyo iyi Liverpool iracyafite umukino igomba gukina.