AmakuruAmakuru ashushyeImikino

Champions League: Bayern Munich yanyagiriye Chelsea i wayo, Napoli igwa miswi na FC Barcelone (Amafoto)

Mu ijoro ryo kuri uyu wa Kbiri tariki ya 25 Gashyantare 2020, nibwo imikono ya 1/8 mu irushanwa rihuza amakipe yabaye aya mbere i wayo i Burayi, UEFA Champions League, , aho Chelsea yo mu Bwongereza yatsindiwe iwayo na Bayern Munich yo mu Budage ibitego 3-0.

Imikino ya 1/8 ya Champions League yatangiye gukinwa mu cYumweru gishize, mu gihe iyo kwishyura yo iteganyijwe mu kwezi gutaha.

Mu mukino wabaye ejo ku wa kabiri i Stamford Bridge mu Bwongereza, Chelsea yari imbere y’abafana bayo, yanyagiwe na Bayern Munich yayisatiriye kuva ku munota wa mbere kugeza ku wa nyuma birangira iyitsinze ibitego 3;0.

Iyi kipe yo mu Budage ni yo ya yabonye uburyo bwa mbere bugana mu izamu, umupira watewe na Thomas Müller ufatwa na Willy Caballero mbere y’uko na Kingsley Coman atera ishoti ryanyuze ku ruhande gato.

Uburyo bwa mbere bwabonetse ku ruhande rwa Chelsea, bwabonywe na Ross Barkley ku munota wa 23, ishoti yateye rica ku ruhande rw’izamu ryarimo Manuel Neuer.

Bayern Munich yakomeje gusatira ndetse ihusha uburyo bubiri bwiza bwabonywe na Robert Lewandowski. Umupira wa mbere yawutanzwe na Caballero mu gihe irindi shoti yateye, ryashyizwe muri koruneri n’uyu munyezamu naho Thomas Müller na we yongera gutera undi mupira ukomeye wanyuze ku ruhande.

Habura iminota mike ngo igice cya mbere kirangire, Chelsea yashoboraga gufungura amazamu ku mupira Olivier Giroud yacomekewe na Mateo Kovačić mu rubuga rw’amahina, ariko uyu rutahizamu w’Umufaransa ananirwa kuwugeraho aserebetse, urarenga.

Ibitego bibiri bya mbere bya Bayern Munich byabonetse mu minota ya mbere y’igice cya kabiri. Icya mbere cyaturutse ku guhanahana kwa Serge Gnabry na Robert Lewandowski wasubije umupira uyu mugenzi we, ahita awutereka mu rushyundura.

Nyuma y’iminota ibiri n’ubundi Lewandowski yatanze umupira kuri Serge Gnabry watsinze ikindi gitego ku ruhande rwa Buyern. Gnabry yahise ageza ibitego bitandatu muri Champions League y’uyu mwaka, byose yatsindiye mu Mujyi wa Londres, birimo bine yatsinze Tottenham.

Habura iminota 15 ngo umukino urangire, Alphonso Davis yacenze abakinnyi b’inyuma ba Chelsea yihuta, ahindura umupira mu rubuga rw’amahina, ushyirwa mu izamu na Lewandowski watsinze igitego cya gatatu.

Chelsea yasoje umukino ari abakinnyi 10 mu kibuga, ni nyuma y’uko Marcos Alonso yahawe ikarita itukura akubise inkokora Robert Lewandowski ku munota wa 80.

Undi mukino ubanza wa 1/8 wabaye ejo, warangiye Napoli yo mu Butaliyani, inganyije FC Barcelone yo muri Espagne igitego 1-1.

Dries Mertens yatsindiye Napoli ku munota wa 30 mu gihe igitego cya FC Barcelone cyishyuwe na Antoine Griezmann ku munota wa 57.

Imikino yo kwishyura izaba tariki ya 18 z’ukwezi gutaha mu Budage no muri Espagne.

Kuri uyu wa Gatatu hateganyijwe indi mikino ibiri ya 1/8 ibanza ari nayo isigaye. Lyon yo mu Bufaransa irakira Juventus yo mu Butaliyani saa yine z’ijoro (22:00) mu gihe Real Madrid yo muri Espagne yakira Manchester City yo mu Bwongereza.

Twitter
WhatsApp
FbMessenger