AmakuruImikino

CAF CL: Mamelodi Sundowns yaciye agahigo ko gutsinda ibitego byinshi mu mukino umwe

Ikipe ya Mamelodi Sundowns yo mu gihugu cya Afurika y’Epfo, yaraye itsinze Cote d’Or yo mu birwa bya Seychelles ibitego 11-1, iba ikipe ya mbere ibashije gutsinda ibitego byinshi mu mukino umwe mu mateka ya CAF Champions league.

Aya makipe yombi yari yahuriye mu mukino wo kwishyura w’ijonjora rya kabiri rya CAF Champions league, umukino wasize Masandawana ikatishije itike y’amatsinda ya CAF Champions league.

Gutsinda uyu mukino byatumye Mamelodi Sundowns ica agahigo kari gafitwe na Difaa Jadida yo muri Maroc yari yaratsinze Bissau e Benfica yo muri Guinea Bissau ibitego 10-1. Ibi byabaye mu mwaka ushize.

Muri rusange Mamelodi Sundowns yakomeje ku giteranyo cy’ibitego 16-1.

Mu bitego 11 iyi kipe yatsinze ejo, bitandatu byinjiye mu gice cya mbere cy’umukino, ibindi bitanu byinjira mu gice cya kabiri.

Muri ibi bitego harimo Ha-trick ya Sibusiso Vilakazi, bibiri bya Themba Zwane, kimwe cya Gaston Sirno, icya Thapelo Morena, Motjeka Madisha, Anele Ngcongca, Mauricio Affonso ndetse n’icy’umusore witwa Beniot yitsinze.

Abanya-Seychelles babonye impzamarira ku munota wa 79 w’umukino babifashijwemo n’umusore witwa Voavy.

 

Twitter
WhatsApp
FbMessenger