CAF Champions league: Rayon Sports yamenye ikipe bazahura mu ijonjora ry’ibanze

Ikipe ya Rayon Sports yamenye ko igomba guhura na Al Hilal yo muri Sudani, mu ijonjora ry’ibanze ry’irushanwa rihuza amakipe yabaye aya mbere iwayo ku mugabane wa Afurika, Total CAF Champions league.

Rayon Sports igomba guhagararira u Rwanda muri iyi mikino, nyuma yo kwegukana igikombe cya shampiyona y’u Rwanda y’umwaka wa 2018/2019.

Iyi kipe ikunzwe na benshi mu Rwanda yaherukaga guhagararira igihugu mu mikino Nyafurika muri 2018, ubwo yari ihagarariye u Rwanda mu mikino Nyafurika ihuza amakipe yatwaye ibikombe iwayo, Total CAF Confederations cup, aho yasezerewe na Enyimba yo muri Nigeria igeze muri ¼ cy’irangiza.

Iyi kipe ya Al Hillal Rayon Sports yatomboye, si igihe kinini gishize ivuye mu Rwanda kuko muru uyu mwaka yahaje ikina na Mukura Victory Sports mu ijonjora rya nyuma rya CAF Confederations Cup, bikarangira iyisezereye ku giteranyo cy’ibitego 3-1.

Umukino ubanza uteganyijwe kubera I Kigali hagati y’itariki ya 9 n’iya 11 Kanama, hanyuma iyo kwishyura ikinirwe I Khartoum hagati y’itariki ya 23 n’iya 25 Kanama.

Mu gihe Rayon Sports yaba ibashije gusezerera Al Hillal, mu kiciro gikurikira yahura n’ikipe izarokoka hagati ya Rahimo FC yo muri Burkinafaso na Enyimba FC yo muri Nigeria.

Ikipe ya AS Kigali yo ihagarariye u Rwanda muri CAF Confederations Cup, igomba guhura na KMC yo muri Tanzania mu ijonjora ry’ibanze.