Bundesliga: Bayern Munich yari yarigize ishyano yahangamuwe na Frankfurt
Ikipe ya Bayern Munich yatsinzwe bikomeye na Frankfurt, nyuma y’uko myugariro wayo Jerome Boateng yari amaze kwerekwa ikatita itukura ku munota wa cyenda w’umukino.
Hari mu mukino w’umunsi wa 10 wa shampiyona y’Abadage warangiye Frankfurt inyagiye Bayern ibitego 5-1.
Ikipe ya Frankfurt yabanje gukora mu jisho Bayern hakiri kare cyane, ubwo Filip Kostic na Djibril Sow bayitsindiraga ibitego bibiri, gusa Robert Lewandowski akaza kugomboramo kimwe cyabaye icya 14 amaze gutsinda muri shampiyona y’uyu mwaka.
Mbere gato y’uko igice cya mbere kirangira Frankfurt yatsinze igitego cya gatatu ibifashijwemo na David Abraham, mbere y’uko Martin Hinteregger na Goncalo Paciencia bongeramo ibindi bibiri.
Gutsindwa uyu mukino byatumye Bayern Munich isigara irushwa amanota ane na Borussia Monchengladbach ikomeje kuyobora shampiyona y’Abadage. Magingo aya Bayern iri ku mwanya wa kane, inyuma RB Leipzig yanyagiye Mainz ibitego 8-0 na Dortmund yatsinze Wolfsburg ibitego 3-0.
Ikipe ya Bayern Munich yakomwe mu nkokora n’ikarita itukura yeretswe myugariro Jerome Boateng, nyuma yo gutereka hasi Paciencia wari uyoboye contre-Attaque ya Frankfurt.
Cyakora cyo n’ubwo iyi kipe y’umutoza Nico Kovac yanyagiwe muri uyu mukino, yihariye umupira ku kigero cya 61%.
