Bugesera FC yatandukanye n’umutoza Muhire Hassan, iha akazi umutoza mushya
Ikipe ya Bugesera FC yamaze gutandukana n’umutoza Muhire Hassan wari umaze amezi atatu ayitoza, imusimbuza Bisengimana Justin ‘Dimateo’ wahoze atoza ikipe ya Sunrise y’i Nyagatare.
Bugesera FC yemeje aya makuru ibicishije ku rubuga rwayo rwa Twitter.
Iyi kipe yashimiye umutoza Muhire Hassan ku byo yayigejejeho mu mezi atatu yari amaze ayitoza, imwifuriza amahirwe masa mu zindi nshingano nshya yahawe.
Bugesera yagize ati” Turashimira umutoza Hassan Muhire ku kazi gakomeye yakoze mu mezi atatu ashize muri Bugesera FC mu bihe bitari byoroshye,n’ubwo tudakomezanyije kubera izindi nshingano afite ahandi! Tumwifurije amahirwe.”
Uretse gutandukana na Hassan no guha akazi umutoza Bisengimana Justin, Bugesera FC yatangaje ko Tumaine Emmanuel ari umutoza mushya wayo ushinzwe kongerera abakinnyi ingufu.
Bisengimana Justin wagizwe umutoza mushya w’ikipe ya Bugesera FC, yaherukaga gutandukana n’ikipe ya Sunrise nyuma yo kuyitoza imikino 25 ya shampiyona. Muri Gicurasi uyu mwaka ni bwo uyu mutoza yari yatandukanye n’iyi kipe y’i Nyagatare, nyuma yo kwitwara nabi mu mikino yo kwishyura ya shampiyona y’umwaka ushize.
