BNR yambuye ububasha kimwe mu bigo bikora mirimo yo kuvunja amafaranga y’amanyamahanga mu Rwanda
Kuri uyu wa kabiri tariki ya 2 Ugushyingo 2021 , Banki Nkuru y’u Rwanda (BNR) , yatangaje ko yambuye ububasha bwo gukorera mu Rwanda imirimo yo kuvunja amafaranga y’amanyamahanga na serivisi zo kohereza amafaranga kimwe mu bigo bikorera mu Rwanda iyo mirimo.
Iki kigo cyambuwe ububasha cyitwa UNIMONI Bureau De Change Ltd kubera kutubahiriza ibisabwa n’amategeko ubusanzwe gikorera mu bihugu bisaga 170 byo ku Isi, kikaba cyarahoze cyitwa UAE Exchange.
Mu Rwanda iki kigo cyatangaga serivisi zo kohereza no kwakira amafaranga haba ku bantu ku giti cyabo ndetse no ku bigo, kuvunja amafaranga y’amahanga n’izindi serivisi z’imari zitandukanye.
Mu itangazo iyi Banki yanyujije ku rubuga rwa Twiter rigira riti “UNIMONI Bureau De Change Ltd yambuwe uruhushya rwo gukorera imirimo yo kuvunjisha y’amanyamahanga no gutanga serivisi zo kohereza amafaranga kubera impamvu zo kutubahiriza ibisabwa n’amategeko .”
Iri tangazo rikomeza rigira riti “ Abantu bose bamenyeshejwe ko uzakorana n’iki kigo kimaze imyaka isaga itatu gikorera mu Rwanda muri ibyo bikorwa bihagaritswe azirengera ingaruka zabyo.”
Hagati aho Banki Nkuru y’u Rwanda yijeje abaturarwanda ko izakomeza gusigasira no kureberera imikorere myiza y’urwego rw’imari nk’ikigo gishinzwe kugenzura imikorere y’ibigo byahawe uburenganzira bwo kuvunja ifaranga hagamijwe kurinda ubusugire n”agaciro k’amafaranga y’igihugu.
