APR FC yegukanye igikombe cy’imikino ya gisirikare mbere yo gukina umukino wa nyuma
Ikipe ya APR FC yegukanye igikombe cy’imikino ya gisirikare ihuje amakipe yo mu karere ka Afurika y’Iburasirazuba, mbere yo gukina umukino wa nyuma wayo kuri uyu wa gatanu ihura na Ulinzi Stars yo muri Kenya.
APR FC yegukanye iki gikombe nyuma y’uko TPDF yo muri Tanzania yashoboraga kuyibuza iki gikombe itsinzwe na UPDF ihagarariye Uganda ibitego 2-0, mu mukino wabaye ku munsi w’ejo.
Ibi bisobanuye ko n’ubwo APR FC yatsindwa na Ulinzi bitayibuza gutwara iki gikombe. Magingo aya APR FC iracyayoboye n’amanota icyenda, ikuririwe na TPDF yarangije imikino yayo ifite amanota atandatu, KDF (Ulinzi) ni iya gatatu n’amanota ane inganya na UPDF, mu gihe FNDB ari iya nyuma n’amanota atatu.
APR FC yatangiye iyi mikino itsinda UPDF igitego kimwe ku busa, nyuma itsinda Muzinga y’i Burundi ibitego bitatu ku busa mbere yo gutsinda TPDF ibitego 3-1.
Iyi mikino ya gisirikare irasozwa kuri uyu wa gatanu APR FC ikina na KDF (Ulinzi Stars) ihagarariye igisirikare cya Kenya.
APR FC irakina uyu mukino idafite rutahizamu Ishimwe Kevin umaze kuyitsindira ibitego bitatu muri iri rushanwa kuko afite amakarita abiri y’umuhondo atamwemerera gukina.
