APR FC: Umutoza Petrović yakoresheje imyitozo ye ya mbere
Umutoza mukuru wa APR FC Dr Petrović n’umwungiriza we Radanovic Miodrag baraye bakoresheje imyitozo ya mbere kuva bava mu biruhuko iwabo muri Serbia, mu rwego rwo kwitegura shampiyona y’ikiciro cya mbere iteganyijwe gutangira mu ntangiriro z’Ukwakira.
Ni nyuma yo kugera i Kigali ku munsi wo ku cyumweru.
Imyitozo yo ku munsi w’ejo ya APR FC yanitabiriwe na bamwe mu bakinnyi bari bamaze iminsi bari kumwe n’ikipe y’igihugu Amavubi cyo kimwe n’umutoza Jimmy Mulisa na we wari kumwe n’Amavubi yiteguraga ikipe y’igihugu ya Cote d’Ivoire.
Abakinnyi bagarutse mu myitozo nyuma yo kuva mu kipe y’igihugu; barimo Iranzi Jean Claude, Kapiteni Mugiraneza Jean Baptiste Migi, Ombolenga Fitina cyo kimwe na Emmanuel Imanishimwe.
Iyi kipe y’ingabo z’igihugu yakomeje imyitozo mu gitondo cy’uyu wa kabiri ndetse ikaza no kuyikomeza ku gicamunsi i Shyorongi aho isanzwe yitoreza.
