APR FC iri mu nzira zo gusinyisha abakinnyi 7 izafashisha umwaka utaha
Mu rwego rwo gukomeza kubaka ikipe ikomeye,APR FC irateganya kuzasinyisha abakinnyi barindwi bakomeje kwitwara neza muri shampiyona y’Icyiciro cya Mbere mu Rwanda umwaka w’imikino wa 2021-2022.
Abo bakinnyi barindwi bamaze gushimwa n’umutoza mukuru wa APR FC, Adil Erradi Mohammed bamwe iyi kipe izabasinyisha mu isoko ry’igura n’igurisha ry’abakinnyi ryo muri Mutarama, abandi ibasinyishe mu mpeshyi ya 2022.
Umukinnyi usatira izamu aciye iburyo mu ikipe ya AS Kigali witwa Niyibizi Ramadhan niwe uri ku isonga mu bakinnyi bifuzwa na APR FC, abandi ni myugariro w’ibumoso Ishimwe Christian wa AS Kigali.
Abakinnyi babiri bakina hagati mu kibuga muri Gorilla FC aribo Iradukunda Simeon na Nshimiyimana Tharcisse, hakiyongeraho myugariro wo hagati Niyigena Clement na Nishimwe Blaise ba Rayon Sports ndetse na myugariro Nemeyimana Kato Samuel wa Bugesera FC nabo APR FC irabashaka.
Kugeza ubu abo nibo bakinnyi bafite amahirwe menshi yo kuzasinyira ikipe ya APR FC bitewe n’uko urwego rwabo rw’imikinire rwashimwe n’itsinda ry’abatoza b’Ikipe y’Ingabo z’Igihugu.
