Ansu Fati yongeye guca akandi gahigo gakomeye FC Barcelona inganya na Dortmund

Umunya-Guinea Bissau, Ansu Fati ukinira ikipe ya FC Barcelona, yaraye aciye agahigo ko kuba umukinnyi ukiri muto mu mateka ya FC Barcelona ubashije gukina muri UEFA Champions league.

Mu mukino w’itsinda F iyi kipe y’i Catalunya yaraye inganyijemo na Borussia Dortmund 0-0, uyu musore ukiri muto yari yabanje mu kibuga, ayoboye ubusatirizi hamwe na Luis Suarez cyo kimwe na Antoine Griezmann.

Ni ku myaka 16 n’iminsi 351 yonyine.

Ibi byatumye aca agahigo kari gafitwe na Bojan Krkic wakiniye FC Barcelona muri Champions league akiri muto, ku myaka 17 n’iminsi 17. Ni mu mukino wa UEFA Champions league FC Barcelona yari yahuriyemo na Olympique Lyonnais mu mwaka w’imikino wa 2007/2008.

Ansu Fati yaciye aka kagiho, nta minsi myinshi ishize aciye utundi dukomeye, harimo ako kuba umukinnyi ukiri muto wakiniye FC Barcelona muri shampiyona ya Espagne, umukinnyi ukiri muto wabashije gutsinda igitego muri iyi shampiyona ndetse no kuba umukinnyi ukiri muto mu mateka ya La Liga wabashije gutsinda igitego akanatanga umupira wacyo mu mukino umwe.

Yasohotse mu kibuga ku munota wa 57 w’umukino asimbuwe na Lionel Messi.

Umukino wa Dortmund na Barcelona warangiye amakipe yombi anganya 0-0, gusa uwavuga ko FC Barcelona yarokotse ntiyaba abeshye.

Borussia Dortmund yabonye penaliti mu gice cya kabiri cy’umukino, gusa Kapiteni Marco Reus ntiyagira umugisha wo kuyinjiza kuko yakuwemo n’umuzamu Andre- Marc Ter Stegen. Uyu musore kandi yagiye anabona ubundi buryo bw’ibitego, gusa umuzamu Ter Stegen akagenda arokora ikipe ye.

Dortmund kandi yakabaye yabonye igitego binyuze kuri Julian Brandt, gusa ishoti rikomeye rye rigarurwa n’umutambiko w’izamu.