AmakuruImikino

Amavubi ashoje 2018 afite umwanya udashimishije ku ruhando mpuzamahanga

Ikipe y’igihugu y’u Rwanda Amavubi ishoje umwaka wa 2018 ihagaze ku mwanya wa 137 ku rutonde rw’ishyirahamwe ry’umupira w’amaguru ku isi, rugaragaza uko ibihugu bihagaze muri ruhago.

Ni ku rutonde rugaragaza uko ibihugu bihagaze ku isi rwasohotse kuri uyu wa kane.

Amavubi aheruka gukina umukino mpuzamahanga anganya na Repubulika ya Centrafurika ari na wo uheruka kugenderwaho ahabwa amanota. Aya manota ashyira Amavubi ku mwanya wa 137 ku isi no ku wa 36 muri Afurika.

Akarere ka CECAFA u Rwanda ruherereyemo, kayobowe n’igihugu cya Uganda gihagaze ku mwanya wa 75 ku isi ndetse no ku mwanya wa 16 muri Afurika.

Igihugu cya Kenya baturanye kiza ku mwanya wa 105 ku isi, Tanzania ku wa 138 mu gihe u Burundi buri ku mwanya wa 139. Igihugu cya Ethiopia cyo kiri ku mwanya wa 151 ku isi.

Magingo aya, Les Lions de la Teranga ya Senegal ni yo iza imbere muri Afurika no ku mwanya wa 23 ku isi. Tunisia ya kabiri iza ku mwanya wa 26 ku isi, Maroc ku wa 40, Nigeria ku wa 44, Congo Kinshasa ku wa 49, Ghana ku wa 51, Cameroon ku wa 55, Misiri ku wa 56, mu gihe Burkinafaso iza ku mwanya wa 61 ku isi.

Ikipe y’igihugu y’u Bubiligi Les Diables Rouges ishoje umwaka wa 2018 iyoboye isi muri ruhago, ikaba irusha iy’u Bufaransa ya kabiri inota rimwe.

Brazil ishoje umwaka ari iya gatatu ku isi, Croatia yashoje ari iya kane mu gihe Three Lions y’Abongereza ishoje 2018 ihagaze ku mwanya wa gatanu ku isi.

Biteganyijwe ko urundi rutonde rw’uko ibihugu bihagaze muri ruhago ruzasohoka ku 07 Gashyantare 2019.

Twitter
WhatsApp
FbMessenger