AmakuruImikino

Amakipe abiri azahurira ku mukino wa Nyuma wa CAF Champions league yamenyekanye

Imikino yo kwishyura y’irushanwa nyafurika rihuza amakipe yabaye aya mbere iwayo yakinwe kuri uyu wa gatandatu, yasize amakipe ya Wydad Casablanca yo muri Maroc na Esperance de Tunis ahuriye ku mukino wa Nyuma.

Aya makipe yombi ni na yo afite ibikombe bibiri bya CAF Champions league biheruka. Ikipe ya Wydad Casablanca yatwaye icyo muri 2017 itsinze Al Ahly ku mukino wa Nyuma, mu gihe Esperance de Tunis yatwaye icyo mu mwaka ushize na yo itsinze Al Ahly yo mu Misiri.

Aya makipe yombi yarangije akazi kayo mu mikino ibanza yari yakiniye ku bibuga byayo. Esperance yari yatsinze TP Mazembe yo muri Repubulika iharanira Demokarasi ya Congo igitego 1-0, mu gihe Wydad Casablanca yari yatsinze Mamelodi Sundowns yo muri Afurika y’Epfo ibitego 2-1.

Abenshi bari biteze ko Mazembe na Mamelodi zizagera ku mukino wa nyuma kubera ibitego bike zari zatsinzwe mu mikino ibanza, gusa ntacyo zigeze zikora imbere y’abafana bazo.

TP Mazembe yanganyirije na Esperance de Tunis i Lubumbashi 0-0, mu gihe Mamelodi Sundowns na Wydad Casablanca na zo zanganyirije 0-0 i Pretoria.

Umukino wa nyuma ubanza uzabera i Rabat muri Maroc hagati y’itariki ya 24 n’iya 25 Gicurasi, uwo kwishyur ubere i Rades muri Tunisia ku wa 31 Gicurasi.

Twitter
WhatsApp
FbMessenger