Aline Gahongayire arakomereza ibitaramo bya “Ineza Tour” i Muhanga
“Ineza Tour” Ibitaramo by’ivugabutumwa bizenguruka igihugu Aline Gahongayire ari gukora biteganyijwe kuzagera mu turere dusaga 12 , kuri iyi nshuro akarere gatahiwe ni akarere ka Muhanga mu ntara y’Amajyepfo.
Kugeza ubu Gahongayire amaze gukorera ibi bitaramo i Kabuga mu karere ka Gasabo n’i Nyamata mu karere ka Bugesera, uyu muhanzikazi mu ndirimbo zo kuramya no guhimbaza Imana atangaza ko muri utwo turere amaze kugeramo muri ibi bitaramo ngo yanyuzwe n’uko yagiye yakirwa n’abantu baho ndetse akaba ashimishwa n’umusaruro ukomeje kuva muri iyi gahunda y’Ibitaramo “Ineza Tour”
Muri ibi bitaramo by’ivugabutumwa bagiye batanga umusanzu ku batishoboye, batanga ubwisungane mu kwivuza ndetse bagashaka umuturage umwe utishoboye bubakira bamufasha kwiyubaka, i Muhanga igitaramo kizaba ku cyumweru tariki 22 Nyakanga 2018 saa cyenda z’amanywa kuri Zion Temple ya Muhanga. Kwinjira muri iki gitaramo ni ubuntu.
Nyuma ya Muhanga “Ineza Tour” izakomereza mu karere ka Huye naho mu ntara y’amajyepfo muri ibi bitaramo Aline Gahongayiire aba yitwaje na album ye “New Woman” aho ababishoboye bagura kopi zayo bagatunga indirimbo ze ziri kuri iyi Album. Hanerekanwa kandi imipira yanditseho ‘Ineza Tour’, ‘Warampishe’… aho umuntu ashobora kuwugura akaba ateye inkunga iki gikorwa cyo gukusanya inkunga yo gufasha no gusanira abatishoboye binyuze mu iyi gahunda y’ibitaramo ya “Ineza Tour.
Aline Gahongayire usanzwe ari n’Umunyamakuru kuri Televiziyo y’u Rwanda mu kiganiro “Be Blessed Show”, Ibi bitaramo yise “Ineza Tour” ni Gahunda ye y’ivugabutumwa ari gukora agamije gufasha abatishoboye, iki gitaramo cy’i Muhanga yatumiyemo abaramyi nka Elyse, umuraperi wa Gospel MD, Babou, Fredon, Olivier The Legend ndetse na Asaph Muhanga.
