AmakuruImikino

Adama Traore yatumye Manchester City irushwa na Liverpool amanota umunani

Ikipe ya Wolves ibifashijwemo n’Umunya-Mali Adama Traore, yatsindiye Manchester City ku kibuga cyayo ibitego 2-0 bituma iyi kipe y’umutoza Pep Guardiola irushwa na Liverpool amanota umunani muri shampiyona y’Abongereza.

Manchester City yari yakiriye Wolverhampton ku kibuga cyayo El Etihad, mu mukino w’umunsi wa munani wa shampiyona y’Abongereza.

Ni umukino abasore b’umutoza Pep Guardiola bihariye mu buryo bugaragara, gusa kumenera mu rukuta rw’ikipe ya Wolves bibabera ihurizo rikomeye cyane.

Amakipe yombi yagiye kuruhuka anganya 0-0. Ni igice Manchester City yabonyemo uburyo bukomeye, harimo n’ishoti rikomeye rya David Silva ryagaruwe n’umutambiko w’izamu.

Mu gice cya kabiri cy’umukino, Nuno Espirito Santos utoza ikipe ya Wolves yahinduye ubururyo bw’imikinire, biba ngombwa ko yigiza inyuma Adama Traore waje no gutsindira ikipe ye ibitego bibiri byombi byaturutse kuri Contre-Attaques.

Icya mbere uyu munya-Mali yagitsinze ku munota wa 80 w’umukino, icya kabiri agitsinda ku munota wa 90 w’umukino.

Gutsindwa na Wolves byatumye Manchester City itsindirwa mu rugo umukino wa mbere kuva mu Ukuboza umwaka ushize, ubwo Crystal Palace yayitsindiraga kuri El Etihad ibitego 3-2.

Uyu mukino usize Liverpool itaratsindwa umukino n’umwe ikiyoboye shampiyona n’amanota 24 mu gihe Manchester City ya kabiri ifite amanota 16.

 

Twitter
WhatsApp
FbMessenger